ميزان الذهب في صناعة شعر العرب

حضراتكم كنتوا طلبتوا بإن اللي عنده علم بالعروض أو الشعر أو القافية أو ما إلى ذلك يساهم بيها ف المنتدى وأنا على استعداد كبير بذلك ولكن عايز من حضراتكم ردود من الناس اللي هيلتزموا معايا وان شاء الله ربنا يقدم اللي فيه الخير وكل عام وانتو بألف صحة وسلامة

شعور رائع بهنيك عليك

لكن قبل ما نتكلم عن الالتزام انا حابة اعرف ايه هيكون المطلوب بعد كل معلومة

يا ترى لازم اكون كاتبه اساسا ولا ممكن نتعلم عادي

بشكرك مرة تانية وبالتوفيق للجميع ان شاء الله

متشكر يابو على وربنا يوفق الكل بإذن الله
لا شكر على واجب ياكلمات وموضوع بعد كل معلومة ده سيبيها لوقتها انتي ممكن لو مش كاتبة أساسا تكتشفي ف نفسك الموهبة دي والمطلوب ممكن يبقى مجرد بيت واحد يتيم أو بيتين ولو مقدرتيش ياستي ممكن نساعدك بس أنا واثق من قدراتك زي ما واثق من قدرات أي واحد ف المنتدى الرائع ده

شكرا جدا على شعورك الجميل ده وعطاءك

ربنا يوفقك ويوفق الجميع بإذن الله

يظهر كدا والله أعلم مفيش حد عايز يتعلم لاعروض ولا غيره غير الأستاذ نشأت والآنسة كلمات واحتمال أكون غلطان ومحدش عايز يتعلم أصلا على العموم طالما اني حاولت فالحمد لله وانا تحت الأمر وفي الخدمة دايما لأي طلب ان شاء الله

طيب انا دلوقتي مش عارف مين اللي هيشترك معايا ومين اللي مش
أنا عايز اجابة صريحة بإن اللي هيشترك يقول "أنا معاك يا محمد" وبعد كدا ألف شكر ليكم

طيب يابو علي هي فكرة رائعة وانا فعلا هعمل بيها ان شاء الله بس ربنا يقدرني ومفيش حاجة تعطلني بس ياريت اللي تقف معاه أي حاجة يطلب مني اعادة شرحها بطريقة أفضل وانا شاء الله أكون عند حسن ظن حضراتكم فيا

فكره جميله وربنا يوفقك استاذ محمد
واضح ان حضرتك متمرس في الشعر
بالتوفيق ان شاء الله

لأ والله يا الشيماء مش موضوع متمرس ولا حاجة أنا لسة هاوي بس بسعى اني احترف الشعر والحمد لله توصلت لدرجة مش بطالة من اجادة الشعر وربنا يعيننا ونكمل مع بعض بإذن الله

انا معاكم في الموضوع

لكن الاكيد اني هكون كسلانة اوي بسبب غيابي الكتير الفترة دي

ربنا يبارك في علم الجميع

طب عال عال هنبدأ أول درس النهاردة ان شاء الله الساعة 10 كدا ولا حاجة بس قولو يارب

ألف شكر يابو علي ونردهالك ف الأفراح ان شاء الله

معلش اتأخرت النهاردة ف أول يوم. بس الظروف بقى. ها مستعدين للدرس الأول؟
نبدأ باسم الله واقول: أنا ان شاء الله هشرح كتاب اسمه: "ميزان الذهب في صناعة شعر العرب". بس أرجو منكم الانتباه ، وعدم الاستهتار ، وياريت تقرأوا الموضوع لنهايته، وبتركيز واللي يحصل عنده أي لغط ، يسألني وان شاء الله هجاوبه ، ولسة التقيل جاي بس هنبدأ بحاجة خفيفة كدا النهاردة وهي:
التعريف بعلم العروض

1- العروض هو: صناعة يعرف بها صحيح أوزان الشعر العربي وفاسدها وما يعتريها من الزحافات والعلل. يعني هو طريقة من خلالها بنفحص بيت الشعر ونشوف اذا كان موزون صح ولا لأ. ولا موزون بس فيه بعض الانحرافات البسيطة اللي هي الزحافات والعلل. وهتيجي بعدين. زي بالضبط لما بنفصص الكلام العربي عن طريق قواعد النحو والصرف.
2- موضوعه هو: الشعر العربي من حيث صحة وزنه وسقمه. سبق عرضه.
3- واضعه هو: أكيد حضراتكم جميعا تعرفوا العالم الكبير الخليل بن أحمد الفراهيدي واضع أسس وقواعد علم النحو. وهو بردو واضع العلم اللي بنتكلم عنه ده. والكلام ده كان ف القرن الثاني الهجري وحصر الشعر كله تخيله ف 16 بحر. والكلام ده حصل عن طريق القراءة الكتير لشعر العرب. وسماه باسم العروض ؛ لأنه وضعه ف المكان اللي اسمه كدا بين مكة والطائف.
4- فائدته هي: العلم ده بيحافظ على اللغة والشعر من الاختلاط على ايد الجيل المولد اللي هو لا عربي خالص ولا أجنبي خالص ، وبيحافظ على الشعر من كسر وزنه ، وبيميز الشعر عن السجع. وبكدا نعرف كلنا ان القرآن الكريم مش شعر. ولا ايه؟
وعلى فكرة الإسنوي حدد فوائد العروض في 3 نقط وهي:
*معرفة الأوزان الصحيحة من الفاسدة.
*معرفة ما يجوز من الشعر ولا يقبله الطبع السليم. يعني شعر موزون بس عيب أو حرام.
*معرفة ما لا يجوز من الشعر ويقبله الطبع السليم. يعني شعر مش موزون بس كلامه حلو.
وبكدا نكون وصلنا لنهاية الدرس الأول. أرجو انكم تكونوا استفدتم وما ملتوش مني
ونكمل بكرا ان شاء الله. بالتوفيق. أخوكم/محمد البلشه

نشات حميدو كتب:والله يا محمد معلومات فى منتهى القيمه
وانا شخصيا سعيد بمعرفتها واتمنى تجيب
بعض الابيات كمثال لنا حى كى تثبت المعلومه
اكثر واكثر شكرا ليك يامحمد وبالتوفيق ان شاء الله
مع تحياتى

طيب بص يا ابو علي. احنا قلنا ان من فوائد العروض ، معرفة السليم ف الوزن بس حرام أو عيب. زي مثلا لما أبو نواس قال:
خط في الأرداف سطر ***** من بديع الشعر موزون
"لن تـنـالـو البـر حتـى ***** تـنـفـقـوا ممـا تـحبـون"
انت ايه رأيك ف الكلام ده؟ حرام ولا لأ؟ يعني لما يجيب كلمة أرداف مع آية من القرآن ، مش حرام؟ مع ان البيتين موزونين ومية مية اهم ، بس لا يقبله الطبع السليم اللي احنا اتكلمنا عنه قبل كدا. وبعدين يا ابو علي ، احنا لسة مفلناش حاجة عشان نشرحها بيبيتين. بس عينيا ليك ياعم نشأت.

الدكتور كتب:معلومات رائعه
بالتوفيق ان شاء الله
وكلنا جميعا نتعلم من
بعضنا البعض
مع التحيه والتقدير

متشكر يادكتور على ردك الجميل وياريت لو في أي حاجة معصلجة معاك تقول لي

معلومات رائعة

والشرح سهل وبسيط ومفهوم

مشكور

واكيد منتظرين الدرس التالي

كلمات كتب:معلومات رائعة

والشرح سهل وبسيط ومفهوم

مشكور

واكيد منتظرين الدرس التالي

طب الحمد لله كدا الموضوع مية مية قوي وكل شيء ماشي عال العال

*أركان علم العروض هي: أوزانه وتفاعيله. وهي متحركات وسكنتات متتابعة على وضع معروف يوزن بها أي بحر من بحور الشعر. يعني اهم أركان علم العروض هي الركنين اللي فاتو دول "أوزانه وتفاعيله" والأوزان والتفاعيل دول عبارة عن حروف متحركة وحروف تانية ساكنة بس بتترتب ورا بعض في نظام محدد ومضبوط.
*وتتركب هذه الأوزان من ثلاثة أشياء: أسباب وأوتاد وفواصل. وللعلم خدوا الأسماء دي من أجزاء الخيمة. والتفاعيل بتاع الأشياء دي محصورة في عشرة حروف جمعناها في عبارة "لمعت سيوفنا" ومفيش حروف غيرها أبدا. وعلشان نفهم يعني ايه أسباب وأوتاد وفواصل تعالوا. معايا نشوف الشرح اللي جاي ده:
- السبب: عبارة عن حرفين. هنستعرضة مع بعض كما يلي
أ/ لو الحرفين متحركين زي مثلا لما نقول "لِمَ - بك - لك" يبقى "سبب ثقيل" يعني ساعة النطق تحس ان الحروف تقيلة كدا ف الكلام ومتحبش تقولها.
ب/ لو كان الحرف الأول متحرك والتاني ساكن يعني زي ما نقول "هب لي من لدنك وليا" لو خدنا من الآية دي كلمات "هب - لي - من" هنلاقيها "سبب خفيف" وطبعا عكس الثقيل أكيد هيبقى نطقه خفيف على اللسان.
- الوتد: عبارة عن ثلاثة أحرف " اتنين متحركين وواحد ساكن" وشرحه ما يلي
أ/ لو الحرفين المتحركين جم ورا بعض وبعدهم الحرف الساكن يعني زي لما تيجي ترد على حد بينادي عليك وتقول له "نعم" أو زي مثلا ما تقول "غزا" في الحالة دي يكون الوتد اسمه "وتد مجموع" لأننا جمعنا الحرفين المتحركين مع بعض.
ب/ ولو المتحركين بيفصلهم الحرف الساكن يعني زي ما تقول "مات - نصْر" يبقى الوتد ف الحالة دي اسمه "وتد مفروق". وقولوا لي انتو بقى ليه اسمه كدا.
- الفاصلة: بتبقى 3 أو 4 حروف متحركة وبعدهم ساكن وهي كما يلي
أ/ لو 3 حروف متحركة بعدهم ساكن زي "سكنوا - مدنا" فتبقى اسمها "فاصلة صغرى".
ب/ ولو كان 4 حروف بعدهم ساكن زي "قتلهم - ملكنا" بتبقى "فاصلة كبرى"
وأكيد الفرق واضح بين الفاصلتين. صح؟
*وممكن بقى نجمع الأسباب والأوتاد والفواصل في جملة واحدة بتقول:
( لـم - أر - عـلـى - ظـهـر - جـبـلـن - سـمـكـتـن )

*وعلى فكرة نسيت أقول لكم ان ف الخط العروضي بنرمز للحرف المتحرك بشرطة مائلة "/" والحرف الساكن بدائرة صغير شبه الرقم خمسة كدا "0".
فعشان نفهم الجملة بقى هنقطعها مع بعض وياريت كل واحد يكتبلي تقطيع كل كلمة ف رد من عنده ويفرق بين كل كلمة والتانية من حيث السبب والوتد والفاصلة.
وأرجوا انكم تكونوا فهمتوا حاجة من درس النهاردة وكالعادة اللي تقف معاه أي جزئية ف الشرح يسألني وأنا ان شاء الله وبعونه هبسطها له.

نشات حميدو كتب:ماشاء الله عليك
تسلم يا محمد
هو ده الشغل المظبوط والمعلومات
اللى تستحق المتابعه من هواه الشعر
مع تحياتى

الله يخليك يابو علي وتكون من المهتمين بالموضوع وتوريني تقطيعك للجملة

مش هينفع كدا ياجماعة. يعني أنا شرحت الدرس وطلبت منكم تمرين خفيف ومحدش عمله. ينفع كدا يعني؟ امال لما نخش ف البحور واطلب منكم قصايد هتعملوا ايه؟ لو مش عايزين الدروس دي يا اخواننا قولوا لي وانا هوقفها.

على فكرة أنا مش هشرح دروس جديدة غير لما أشوف تقطيع الجملة

معلش يابو علي بس انا بردو مش هفضل اتعب ف قلبي ومن غير ما حد يستفيد وانا ضميري مش هيرتاح غير لما الاقي نتيجة للي بعمله وأكيد انت عارف ان النتيجة دي هتكون بتنفيذ اللي بشرحة على هيئة تمارين بسيطة جدا

والله بجد مجهود عظيم ورائع منك محمد

وربنا يجازيك خير على ما تقدمه وعلى العلم الذى تنفع به غيرك

وخيركم من تعلم العلم وعلمه وان شاء الله أكيد بنستفيد من دروسك

وان شاء الله ربنا يجعله فى ميزان حسناتك

وفقك الله وأعانك دائما على تقديم العلم والمعلومات للجميع ربنا يوفقك

طيب يا أخت سمسمة لو بتستفيدو فين التطبيق بقى؟

الشرح واضح وبسيط

حل الواجب

وتد مفروق". وقولوا لي انتو بقى ليه اسمه كدا.

سمي بذلك لان الحرف الساكن فرق بين الحرفين المتحركين

( لـم - أر - عـلـى - ظـهـر - جـبـلـن - سـمـكـتـن

عندي سؤالين

الاول التنوين نون ساكنة زائدة تلفظ ولا تكتب ليه كتبت في كلمة جبلا وسمكة

الثاني ممكن مثال من حضرتك يوضح طلبك مننا



مشكوووور جدا على المعلومات

وكلي اسف على على تاخري في الرد

كلمات كتب:

التطبيق

لم
سبب خفيف
ورمزها /0


ار
سبب ثقيل
ورمزها //



على

وتد مجموع
رمزها //0

ظهر
وتد مفروق
رمزها
/0/

جبلن
فاصلة صغرى
رمزها
///0

سمكتن
فاصلة كبرى
رمزها
////0

براااااااااافووووووووو ياكلمات
بس انتي درستي الحاجات دي قبل كدا؟

فين العلامة يا استاذ
والهدية

اول مرة اتطرق الى الموضوع ده لكن شرحك بسيط ووافي وان دل على شئ فيدل على مدى تمكنك من المعلومات

بتمنالك التوفيق

طب الحمد لله. على كدا بقى هتكملي معايا ان شاء الله؟

ان شاء الله هتابع اكيد الدروس

طيب عال. كدا تمام قوي
نبدأ الدرس الثالث ونقول: بسم الله
عنوان الدرس: التفاعيل العشرة
وهي التفاعيل التي تتولد من ائتلاف الأسباب مع الأوتاد والفواصل. يعني لما نجمع كل الأسباب سواء خفيفة أو ثقيلة مع كل من الأوتاد والفواصل بأنواعها نحصل على التفاعيل دي وقالوا انهم عشرة بالتمام والكمال وهنستعرضهم كالتالي:
فعولن - مفاعيلن - مفاعلتن - فاع لاتن - فاعلن - فاعلاتن - مستفعلن - متفاعلن - مفعولات - مستفع لن.
والعلماء قسموا التفاعيل دي لنوعين كالتالي:
1- تفاعيل خماسية: فعولن - فاعلن
2- تفاعيل سباعية: مفاعيلن - مفاعلتن - فاعلاتن - متفاعلن - مفعولات - فاع لاتن - مستفعلن - مستفع لن.
وقالوا ان التفاعيل دي ملهاش دلالة من حيث المعني زي الأوزان المصرفية بتاع صيغ المبالغة مثلا والأشياء الاخرى دي. هي دلالتها بس من حيث انها عبارة عن شوية حركات وسكنات جنب بعضها علشان تعبر عن موسيقى الكلمة.
ودلوقتي بقى نخش على شرح كل تفعيلة لوحدها. والله المستعان:
1- فعولن: التفعيلة دي عبارة عن وتد مجموع اللي هو حركتين فساكن ويتمثل في "فعو" ووراه على طول سبب خفيف اللي هو طبعا حركة فسكون ومتمثل في "لن". زي ما نقول مثلا يعني كلمة "محاشي" وهي على وزن تفعيلة "فعولن". وعلى فكرة حاجة لقدام بقى. التفعيلة دي هي أساس بحر المتقارب. وهبقى انشر آخر قصائدي على البحر ده ان شاء الله.
2- مفاعيلن: وبردو التفعيلة دي بادئة بوتد مجموع متمثل في "مفا" بس هي بتنتهي بسببين خفيفين الأول في "عي" والثاني في "لن" زي مثلا كلمة "مساميرٌ" بتنوين الراء.
3- مفاعلتن: والتفعيلة دي كمان بدأت بوتد مجموع موجود في "مفا" بس ورا الوتد ده على طول هنلاقي سبب تقيل اللي هو حركتين ورا بعض وأكيد كلنا عارفينه ان شاء الله والسبب الثقيل ده موجود في "علَ" وفي الآخر هنلاقي السبب الخفيف متمثل في "تن" وممكن نطبق التفعيلة دي على كلمة "مساهمةٌ" مثلا بردو مع تنوين الحرف الأخير.
4- فاع لاتن: التفعيلة دي بقى غير اللي فاتوا عشان هي بدأت بوتد مفروق اللي هو حركة فسكون ثم حركة. عارفينه؟ وهو متمثل في البداية اللي هي "فاع" وانتهى بسببين خفيفين الأول في "لا" والثاني في "تن" وممكن نلاقيها ف كلمة "قاتلاتٌ" بالتنوين.
وقالوا العلماء ان التفاعيل الأربعة اللي فاتوا دول هي الأصول والستة اللي باقية هي الفروع لأنهم بيقولوا ان الأصل هو كل ما بدأ بوتد سواء مفروق أو مجموع. والفرع هو اللي بدأ بسبب سواء كان خفيف أو ثقيل. ونخش بقى على التفاعيل الستة الفرعية:
5- فاعلن: وبتتكون التفعيلة دي من سبب خفيف في الأول موجود في المقطع "فا" ووراه على طول وتد مجموع في المقطع "علن" وهي في كلمة "حابسٌ" مع التنوين بردو.
6- فاعلاتن: والتفعيلة دي عبارة عن سبب خفيف متمثل في "فا" وراها وتد مجموع "علا" وفي النهاية هنلاقي سبب خفيف في المقطع "تن" وممكن نلاقيها في كلمة "حاكماتٌ" بالتنوين.
7- مستفعلن: ودي بقى حبيبتي دي التفعيلة دي بدأت بسببين خفيفين ورا بعض الأول في "مس" والتاني في لامؤاخذة "تف" وفي النهاية هنلاقي وتد مجموع متمثلا في المقطع "علن" وممكن نعبر عن التفعيلة دي ف كلمة "مستشرقٌ" مع التنوين بردو. وعلى فكرة نسيت اقول لكم ان التفعيلة دي أساس بحر الرجز وهنتكلم عليه ف المستقبل ان شاء الله.
8- متفاعلن: عبارة عن سبب تقيل "متَ" لازق فيه سبب خفيف "فا" وراهم وتد مجموع في المقطع "علن". وهنلاقيها ان شاء الله في كلمة "متفائلٌ" بردو مع تنوين الحرف الأخير.
9- مفعولات: تتركب التفعيلة دي من سببين خفيفين ورا بعض وهما "مف" "عو" ووراهم هنلاقي الوتد المفروق في المقطع "لات" وكلمتها ممكن تكون "محبوبات" من غير تنوين.
10- مستفع لن: والتفعيلة دي مختلفة شوية عن اللي فاتوا هي أولا بتتكون من سبب خفيف في المقطع "مس" وراه وتد مفروق وهو "تفع" ثم في النهاية هنلاقي السبب الخفيف في المقطع "لن" والخليل ابن أحمد الفراهيدي فصل العين عن اللام عشان يبين ان العين هي نهاية الوتد المفروق ويميز التفعيلة دي عن تفعيلة " مستفعلن".

بكدا والحمد لله أكون خلصت شرح الدرس الثالث. اللي محتاج أي حاجة أو مش فاهم أي حاجة يسألني وأنا ان شاء المولى هجاوب عليه. أما بقى اللي فاهم يجاوب على سؤال التطبيق وهو كالتالي:
عايز من حضراتكم كل واحد يكتب التفعيلة وقصادها تقطيعها بالرموز اللي اتفقنا عليها اللي هي شرطة مايلة للمتحرك ودايرة للساكن. وأظن بقى مفيش أبسط من كدا. ولا ايه؟

شكرا على مجهود حضرتك

كم المعلومات كبير جدا ولازم احفظها قبل حل الواجب

لكن مبدئيا ان شاء الله انه مفهوم ومافيش مشاكل

تقديري واحترامي لمجهود حضرتك

كلمات كتب:شكرا على مجهود حضرتك

كم المعلومات كبير جدا ولازم احفظها قبل حل الواجب

لكن مبدئيا ان شاء الله انه مفهوم ومافيش مشاكل

تقديري واحترامي لمجهود حضرتك

عادي براحتك. إفري ثنج إز أوكيه

واكيد طبعا فاع لاتن كتبت هكذا من اجل التفريق بينها وبين فاعلاتن

مش بقوللك درستي قبل كدا؟
مهو حاجة من الاتنين يا اما درستي الحاجات دي قبل كدا أو عندك كتاب وبتذاكري منه. صح؟ ولا انا غلطان؟

العكس تماما اول مرة اعرف المعلومات دي

ولا عندك كتاب بتذاكري منه؟

على العموم ده شيء يسعدني طبعا اني

أشوف ان في تقدم ف الموضوع ده

بارك الله فيكم