حسبناها غلط

من طرف **انت الحب** الخميس فبراير 03, 2011 12:22 pm

تجيب كيلو جبنة وعلبة حلاوة
آتاري العلاوة مجرد أتاوة
و احنا علينا الكلام اختلط
*****
عشان في البداية حسبناها خير
و قلنا نواية حتسند يا زير
و حسنة حتمنع بلاوي كتير
و كنا حقيقي في غاية العبط
*****
في لحظة افتكرنا ان لينا حقوق
و نمنا و صحينا لقينا الخازوق
و قبل اما حتى يا عالم نفوق
لقينا اللي لسه حناخده اتشفط
*****
أفندينا يعني في لحظة تجلي
تعطف تلطف و قرر يخللي
مساحة الغلابة تزيد ستة مللي
و ياكلو بدال التراب الزلط
*****
أفندينا أعلن صدور القرار
و قبل اما ينجح في أي اختبار
فوجئنا بزفة و مولد و زار
قصايد جرايد برامج يفط
*****
تؤكد بأن الحكومة بذكاء
و من حزمة واحدة قضت ع الغلاء
و لابد يبقى لدينا انتماء
و ناكل و نشرب و نلبس خطط
*****
عبال النمو اللي قالوا عليه
و حايشينه عنا منعرفش ليه
ماتلمح مكانا في مرة عينيه
و نقدر ندوق منه حتى نقط
*****
مادام كل حاجة تمام ع الورق
مفيش أي داعي عشان القلق
و لو مش مصدق خلاص اتفلق
ورقنا اللي صح وكلامك غلط
*****
و قاللي مواطن عليم بالخبايا
أفندينا قرر تزيد الجباية
عشان شعبه جاحد قليل الرباية
بياكل و ينكر زي القطط
*****
اذا الشعب صدى بفعل البارومة
حتعمل حسابه ف ايه الحكومة
وهي اللي جاهزة بكرباج وشومة
عشان لوفي واحدفي عقله اتخبط
*****
تعيش مصر دايما في عز و جمال
يعيش الواطن شديد الاحتمال
و آمن تماما من الاشتعال
و أقصى ما عنده ينكت فقط

من طرف حاتم رمضان الخميس فبراير 03, 2011 12:27 pm

ههههههههههههههههههههههههه

جميله جدا جدا جدا تسلمى

من طرف **بنت من شبرا** السبت فبراير 05, 2011 8:14 am

جميله اوى اوى تسلم ايدك

وكمان دمها خفيف وكلنا بندعى لمصر

من طرف **نشات الريس** الأحد فبراير 06, 2011 8:34 am

اعشتى يامجروحه وعاشت مصر حره مستقله ومستقره باذن الله

شكرا على موضوعك الرائع

من طرف **smsm** الأربعاء فبراير 23, 2011 4:45 pm

والله رائع وكلماتك بسيطه وجميله ربنا يسعدك

اهم شئ الورق مضبوط

والخطة ماشية تمام

وكلماتك ممتعة وجميلة

ومحيرة نضحك ولا نبكي

مشكورة

من طرف محمد الصياد الخميس فبراير 24, 2011 7:34 am

تسلم ايدك وكلمات جميلة بجد
بس هو في سؤال محيرني - انا قريت الكلام ده قبل كدا
والله مش تقلليل ليكي بيكفي انك اختارتيه - بس حابب اعرف هو كلام مين
ومرسي علي زوقك