حساب القبر للمصرى كلام ساخر

من طرف **نشات الريس** الأحد ديسمبر 26, 2010 4:54 pm

-مااسمك؟
-والله ماانا فاكر..المفروض انكو عارفينه
-مادينك
-مسلم ان شاء الله
-يعنى ايه؟..مسلم ولاان شاء الله؟

-مسلم ..بس بحب اقدم المشيئه كده
-شقى ام سعيد؟
-مصرى
-يعنى ايه؟
-يعنى سعيد بشقائى
-انت مت ازاى؟
-كنت رايح معهد الاورام اعمل جلسه كيماوى خدتها على نفقه الدوله بعد مابعت صيغه مراتى وعفش البيت وبعد ماصرفت الجمعيه اللى داخل فيها بقالى 10 سنين..والظاهر ان ربنا حب يعاقبنى عشان انا راشى ..قام الميكروباص اللى كنت راكبه عمل حادثه ..بس متهيألى ان ربنا نجانى علشان لما الاسعاف رمانى فى المستشفى لقونى سليم وطلبوا ستميت جنيه علشان يطلعونى من غير مايسرقوا كليتى ..ولما لقونى بعت كليتى اصلا من سنه ..حلفوا انهم مش هيخرجونى الا لما اتبرع بدم ..قلتلهم مش هينفع علشان من يومين عضنى كلب مسعور ...وماصدقونيش الا لما عضيت دكتوره فى رجليها ...اصل انا افتكرتها ممرضه غلبانه ملهاش ديه..طلعت مسنوده بس طالعه سمرا لابوها اللى كان فقير بس ربنا كرمه وبقى حرامى كبير ..وهى داخله تتعالج على نفقه الدوله ..وحلفت انها هتقفل المستشفى لو انا متأدبتش ..والدكاتره اتحايلو عليا انتى مااقاموش الاعتقال علشان المستشفى باب رزق وفتوح للكل...وعلشان انا غلبان مارضيتش اقطع عيش حد ..اه..ماهو لازم اتأدب علشان عضيت رجل بنت الاكابر..وكنت فاكر ان الموضوع هيخلص بسرعه ..بس فى القسم اتأخرنا لان الباشا الظابط مكنش فاضى ..كان بيعذب سواق ميكروباص قعّد امين شرطه على الكرسى القلاب ..والسواق حلف ان كل غلطته انه قال للامين يقعد رابع ورا..لكن لما طلع له الكارنيه قوّم له الواد عمرو اللى كان رايح سفاره كندا علشان يطلب الهجره ..وقعّده جنب ست كبيره كانت رايحه لابنها معتقل من عشرين سنه ..ولما الناس لمّت الاجره الامين صادرها ..وقالهم انه حاسس ان الفلوس دى مزوره ولازم يكشف عليها ..ولما السواق قاله ان ده ميرضيش ربنا ..اممممم وعنها بقى..والكلام ده عرفته بعدين فى الطب الشرعى ...ياعينى على اللى حصل للسواق ...كلام مينفعش اقوله..ولما السواق اعترض وقاله حرام عليك اللى بيحصل ده ..انا بتاع ربنا ..اداله نمره برنامج الله اعلم علشان يستفتى على حكم الشرع فى دخول الحمام بالرجل اليمين ..بس هو غلط وسأل الشيخ عن حكم الشرع فى اللى بيزورا الانتخابات ..فالشيخ قاله ان الجواز العرفى حرام ولما قاله انه جاى من طرف الباشا الظابط قاله ان الجواز العرفى حلال الله اكبر ..بس علشان الشبهات لازم يعمل عمره ..بس السواق قاله انه متعقد منها علشان ابوه وامه غرقوا فى العباره من كذا سنه وهما راجعين من العمره ..فالشيخ قاله انهم شهداء..والسواق اتأثر قوى بكلام الشيخ وخرج فى سبيل الله ...بس اتمسك امن دوله ..اما انا بقى رجعت البيت من غير مااعمل جلسه الكيماوى ..ولقيت مراتى بهيه عامله العشا وقاعده ترجّع علشان السجق طلع فاسد ومنتهى الصلاحيه ولما حاولت اسعفها شاورتلى على ابنى اللى قاعد على الكنبه مفرفر ..واتاريه بعد مارجع من الوحده علشان يتطعم وهو مش على بعضه ...وقلت مابديهاش بقى لازم اتصل بالاسعاف ..وردت عليا فتاه نهار ..وقالت نشترك فى المسابقه..ولما جاوبت غلط قفلت السكه فى وشى ولما اتصلت تانى وحليت صح قام الخط قطع ..

بااااااااااااااااااس هشششششششش كفااااااااااااااااااااااااا ااايه حرااااااااااااام ..كل ده ومعرفناش انت مت ازاى؟؟؟؟؟؟؟!!!!!
-ايه؟..اه..افتكرت انا مت موته ربنا..

-ماكنت تقول كده من الصبح يااخى..يااخى احنا ورانا لسه كتير عاوزين نحاسبهم..عطلتلنا وقتنا....ياجماعه لما تيجوا تحاسبوا اى مصرى بعد كده ماتسألهوش انت مت ازاى...ابقى

اسالوه هو كان عايش ازاااااااااى؟؟؟؟!!!!!